Deputetëve të Kuvendit të Kosovës së shpejti pritet t’i propozohet votimi në lexim të dytë i Projektligjit për parandalimin dhe mbrojtjen nga dhuna në familje, dhuna ndaj grave dhe dhuna në baza gjinore.
Kjo për faktin se dje, anëtarët e Komisionit për të Drejtat e Njeriut, Barazi Gjinore, Viktima të Dhunës Seksuale të Luftës, Persona të Pagjetur dhe Peticione, miratuan amandamentet e këtij Projektligji.
Kryetarja e Komisionit, deputetja Duda Balje, theksoi se Projektligji bashkë me amandamentet e miratuara do të procedohen në Kryesinë e Kuvendit e më pas edhe për votimin e tyre në seancë plenare.
Ndryshe, ky Projektligj ishte votuar në lexim të parë në Kuvendin e Kosovës më datë 28 shkurt 2023, që përkon me Ditën Ndërkombëtare të Gruas.
Sa i përket qëllimit, dispozitat e këtij akti ligjor synojnë të parandalojnë dhe trajtojnë dhunën ndaj grave, dhunën në familje dhe dhunën në baza gjinore.
Po ashtu, Projektligji synon të mbrojë dhe të kontribuojë në eliminimin e të gjitha formave të diskriminimit ndaj grave, promovimin e barazisë gjinore dhe fuqizimin e grave si dhe të ndërtojë mekanizmat e nevojshëm për ofrimin e mbështetjes ndaj viktimave të të gjitha formave të dhunës.
Dispozitat e këtij Projektligji parashihen të jenë të detyrueshme për të gjitha institucionet publike dhe private, individët, shoqërinë civile dhe profesionistët e tjerë përgjegjës, për të ofruar ndihmë, mbështetje, mbrojtje dhe ruajtjen e dinjitetit të viktimave të të gjitha formave të dhunës, sipas dispozitave të këtij Ligji, legjislacionit tjetër në fuqi në Republikën e Kosovës, si dhe konventave dhe instrumenteve kryesore ndërkombëtare të zbatueshme drejtpërdrejt në sistemin e brendshëm juridik./Drejtësia Sot
