Në Kuvendin e Republikës së Kosovës është mbajtur mbledhja e Komisionit hetimor parlamentar në lidhje me rastet e dhunës seksuale dhe dhunës në familje. Kryesuesja e këtij Komisioni Albana Bytyqi, prezentoi statistikat e vitit të fundit mbi dhunën seksuale dhe dhunën në familje.
Formimin e këtij komisioni e kundërshtoi anëtarja Ariana Musliu Shoshi, duke e konsideruar se komisioni mbi të drejtat e njeriut e mbulon edhe pjesën e dhunës seksuale dhe dhunës në familje, kurse kundërshtime për këtë qëndrim pati anëtarja tjetër e komisionit Yllëza Hoti. Ndër të tjera, u vendos që deri në mbledhjën e ardhshme të përgatitet nga anëtaret e komisionit plani për punën në vazhdim./Drejtësia Sot
