Në Gjykatën Themelore në Prishtinë, është anuluar seanca në gjykimin ndaj të akuzuarit Mentor Avdylaj, i cili po akuzohet në cilësinë e oficerit korrektues për veprën penale: “Marrje ryshfeti”.
Lidhur me anulimin e seancës së paraparë të mbahej sot nga ora 10:30 njoftoi zyra e gjyqtares së rastit Fatime Dërmaku dhe se anulimi i seancës është bërë për shkak të obligimeve zyrtare në KGJK-ë të gjyqtares Dërmaku.
‘Për seancën e radhës palët do të njoftohen përmes ftesave zyrtare nga gjykata’, njoftoi zyrta e gjyqtares Dërmaku.
Ndryshe, Prokuroria Themelore në Prishtinë, më 12 dhjetor 2018, ka ngritur aktakuzë ndaj Mentor Avdylajt për veprën penale “Marrje e ryshfetit”, nga neni 422, par. 1 të KPRK-së dhe Astrit Lajqit për veprën penale të ndihmës në kryerjen e veprës penale të marrjes së ryshfetit, i cili tani është në cilësi të dëshmitarit bashkëpunues.
Sipas aktakuzës, Avdylaj në cilësinë e oficerit të Shërbimit Korrektues në Burgun e Dubravës, po akuzohet se kishte marrë 2 mijë euro ryshfet me qëllim të lirimit të parakohshëm të një personi nga burgu, që ishte në vuajtje të dënimit, në atë mënyrë që më 12 mars 2018, në zyrën për lirim me kusht në Qendrën e Shërbimit Korrektues në Dubravë, me dashje dhe në mënyrë të kundërligjshme, me qëllim të përfitimit të dobisë pasurore, kishte pranuar ryshfet përmes të akuzuarit Lajqi, nga i dëmtuari Bajram Hoti.
Gjithnjë sipas aktakuzës, Avdylaj thuhet se 2 mijë euro ryshfet i kishte pranuar nga Lajqi, në pikën e karburantit “Shala Petrol”, në hyrje të Pejës, me qëllim të lirimit të Shpejtim Hotit parakohshëm nga burgu, i cili ishte në vuajtje të dënimit në Qendrën Korrektuese në Dubravë.
Ndërsa, i akuzuari Lajqi thuhet se kishte marrë 2 mijë euro ryshfet nga Bajram Hoti, në prani të dëshmitarit Sherafedin Qerimi dhe ia kishte dërguar Avdylajt.
Shënim: Të akuzuarit e përmendur në këtë postim konsiderohen të pafajshëm derisa të vërtetohet fajësia e tyre me aktgjykim të formës së prerë të gjykatës.
Monitoruar nga: Leotrim Pajaziti
