Në Gjykatën Themelore në Gjakovë, Departamenti për Krime të Rënda, në mungesë të anëtarit të trupit gjykues Sulltan Dobraj ka dështuar të mbahet seanca ku të akuzuar janë Arben Bakalli, Drejtor i Drejtorisë për Planifikim Urban dhe Mjedis dhe Agron Gojani, Urbanist i Sektorit për Planifikim dhe Rregullim Urban si dhe Zenel Shabani zyrtar ligjor për keqpërdorim të detyrës zyrtare.
Kryetari i trupit gjykues, Ilir Rashkaj njoftoi se gjyqtari Sulltan Dobraj mungon në seancën e sotme për arsye familjare, e në këto rrethana seanca e sotme është shtyer.
Sipas aktakuzës, më 10 qershor 2020, në objektin e Komunës së Gjakovës, të pandehurit, duke vepruar si bashkëkryerës e duke e shfrytëzuar detyrën zyrtare, tejkalojnë kompetencat e tyre me qëllim të përftimit të dobisë pasurore për personin T.D.
Në aktin akuzues thuhet se i pandehuri Arben Bakalli, në cilësinë e drejtorit të Drejtorisë për Planifikim Urban dhe Mjedis në Komunën e Gjakovës, në kundërshtim me ligjin ka lëshuar vendim për leje ndërtimi të ndërtesës shumëbanesore, ndërsa i pandehuri Agron Gojani në cilësinë e urbanistit në Sektorin për Planifikim dhe Rregullim Urban, njëherit bartës i lëndës, pranon që të lëshohet leja e lartcekur. Ndërsa i pandehuri Zenel Shabani, si zyrtar i lartë për çështje juridike pranë kësaj drejtorie, harton vendimin për pajisje me leje ndërtimi sipas kërkesës së personit T.D, dhe atë në kundërshtim me nenin 21, par.1 dhe 2 të Ligjit për Ndërtim, dhe në kundërshtim me Planin Rregullues Urban “Jugu 2”, ashtu që me këtë veprim investitorit i’a lejojnë ndërtimin e objektit duke i’a mundësuar përfitimin e dobisë pasurore përmes rritjes së sipërfaqes së objektit prej rreth 563 m2.
Me këtë rast, ata akuzohen se në bashkëveprim kanë kryer veprën penale “Keqpërdorimi i pozitës apo autoritetit zyrtar” nga neni 414, par. 2 lidhur me par.1 dhe neni 31 të KPRK-së.
Shënim: Të akuzuarit e përmendur në këtë postim konsiderohen të pafajshëm derisa të vërtetohet fajësia e tyre me aktgjykim të formës së prerë të gjykatës.
Monitoruar nga Elvana Hatashi
