Gjykata Themelore në Prishtinë – Departamenti Special ka caktuar seancën e shqyrtimit fillestar ndaj dhjetë të akuzuarve për korrupsion dhe mashtrim me subvencione.
Seanca në këtë rast do të mbahet me 20 dhjetor, nga ora 09:30.
Prokuroria Speciale e Republikës së Kosovës (PSRK) kishte njoftuar me 23 nëntor 2023 se ka ngritur aktakuzën e katërt në rastin e njohur si “Subvencionet”.
Sipas PSRK-së, në aktakuzën e rastit “Subvencioni IV” janë të përfshirë 8 persona zyrtarë dhe dy qytetarë.
Personat zyrtarë si të pandehur janë tre zyrtarë nga Agjencia për Zhvillimin e Bujqësisë (AZHB) në Prishtinë, tre zyrtarë të AZHB-së në Regjionin e Pejës, një zyrtar nga Drejtoria për Bujqësi në Komunën e Istogut dhe një zyrtar nga Drejtoria për Bujqësi në Komunën e Lipjanit.
Këta persona zyrtarë akuzohen nga PSRK se në vazhdimësi kanë kryer veprat penale “Marrje ryshfeti’’, “Ushtrimi i ndikimit’’ dhe “Mashtrim në detyrë’’ si dhe për ndihmë në veprën penale “Marrje ryshfeti’’.
Kurse dy qytetarët e përfshirë në aktin akuzues të PSRK-së dyshohen për dhënie të ryshfetit dhe që në vazhdimësi kanë kryer veprën penale “Mashtrim me subvencione”./Drejtësia Sot
Shënim: Të akuzuarit e përmendur në këtë postim konsiderohen të pafajshëm derisa të vërtetohet fajësia e tyre me aktgjykim të formës së prerë të gjykatës.
Monitoruar: Leotrim Pajaziti
