Sot në Gjykatën Themelore në Prishtinë është mbajtur seanca ndaj të akuzuarave Mimoza Beqiri, Behare Bajramin, Ardian Hamitin dhe Betim Ismailin, të cilët po akuzohen për falsifikimin e dokumenteve rreth regjistrimit të studentëve në Universitetin e Prishtinës.
Kryetarja e trupit gjykues, gjyqtarja Medije Bytyqi ka konstatuar se prezent në këtë seancë kanë qenë prokurori Halim Borovci, të akuzuarit me mbrojtësit e tyre, si dhe dëshmitarët.
Tutje, seanca ka vazhduar me dëgjimin e dëshmitarit D.M, ku i njejti ka deklaruar se qëndron prapa deklaratës së dhënë në polici.
Sa i përket procedurës lidhur me aplikimin në fakultet, i njejti ka deklaruar se nuk ju kujtohet për shkak të kohës së gjatë që ka kaluar.
Dëshmitarja E.R, ndër të tjera, ka deklaruar se nuk ju kujtohet se nga kush është pajisur me fletëpagesë të falsifikuar.
E njejta ka shtuar se qëllimi i sigurimit të numrit të të akuzuarës Mimoza, ka qenë që t’a orientojë për regjistrim në fakultet, përmes listës së veteranëve. Sa i përket njohjes me të akuzuarën Mimoza, dëshmitarja ka deklaruar se është njohur përmes një shoqe, e cila ia ka dhënë numrin e Mimozës.
Sa i përket dëshmitares B.Rr, e njëjta ka deklaruar se qëndron prapa deklaratës të dhënë në polici
Në pamundësi për të vazhduar më tutje, gjyqtarja Bytyqi ka caktuar seancën e radhës me datën 3 maj.
Ndryshe, Prokuroria Themelore në Prishtinë ka ngritur aktakuzë më 31 maj 2017, ndaj Mimoza Beqirit, Behare Bajramit, Betim Ismailit, Ardian Hamitit, Ermal Durakut, Anton Jakajt, Daut Ademajt, Ilir Muratit, Rajmonda Osmanit dhe Edona Sallahut, me arsyetimin se nga viti 2013-2014, me qëllim të përfitimit të kundërligjshëm, kanë falsifikuar dokumente të ndryshme.
Me këtë, thuhet se kanë kryer veprën penale “Mashtrimi në vazhdimësi”, neni 335, paragrafi 1 i KPRK-së.
E akuzuara Behare Bajrami, sipas aktakuzës, me qëllim të përfitimit të kundërligjshëm ka keqpërdorur detyrën e saj zyrtare.
Sipas aktakuzës, Mimoza Beqiri, Ermal Duraku, Anton Jakaj, Daut Ademaj dhe Ilir Murati, me qëllim të përfitimit të kundërligjshëm, në vazhdimësi kanë mashtruar të dëmtuarit se do t’i regjistrojnë në fakultete të ndryshme dhe nga ta kanë përfituar shuma parash, duke filluar nga 2 mijë e 100 euro dhe 5 mijë euro për një regjistrim.
Bajrami, gjithnjë sipas aktakuzës, në bashkëveprim me të pandehurit Beqiri, Duraku, Jakaj dhe Ademaj kanë regjistruar të dëmtuarit në fakultete të ndryshme, duke përfituar shuma prej 2 mijë e 100 euro e deri në 5 mijë euro.
Bajrami në cilësinë e bibliotekares në Fakultetin e Edukimit, sipas aktakuzës, ka shfrytëzuar pozitën e saj për t’i bindur të dëmtuarit se është personi kompetent për regjistrimin e tyre në fakultete, derisa e njëjta është vërejtur nga zyrtarët e UP-së.
Me këtë, ajo akuzohet se ka kryer veprën penale “Keqpërdorim i pozitës apo autoritetit zyrtar”, neni 422 i KPRK-së.
Tutje, Prokuroria akuzon Mimoza Beqirin, Behare Bajramin dhe Raimonda Osmanin se kanë tentuar të mashtrojnë Arta Bajramin dhe Valon Imerin se do t’i regjistrojnë në Fakultetin Juridik dhe me këtë kanë kryer veprën penale “Mashtrim në tentativë”, neni 335 i KPRK-së.
Ndërsa, e akuzuara Edona Sallahu, sipas aktakuzës, duke vepruar në bazë të sugjerimeve të Mimoza Beqirit, ka raportuar rrejshëm se i ka humbur kuleta me dokumentacion e në mesin e tyre edhe ID e Fakultetit të Mjekësisë edhe pse asnjëherë nuk ka qenë e pajisur me këtë kartelë.
Sipas kësaj, ajo akuzohet se ka kryer veprën penale “Lajmërim i rremë apo kallëzim rremë”, neni 490 i KPRK-së.
Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.
Monitoruar nga Gentrit Kuqani
