Sot në Gjykatën Themelore në Prishtinë është mbajtur seanca ndaj të akuzuarve Fatmir Musliji dhe Brahim Xhemajli, të cilët po akuzohen për krim të organizuar me narkotikë.
Kryetari i trupit gjykues, gjyqtari Mentor Bajraktari ka konstatuar prezencën e palëve në procedurë.
Për shkak se dëshmitarët gjenden jashtë vendit, prokurorja Merita Bina, ka propozuar që të lexohen deklaratat e tyre, me arsyetimin se ardhja e tyre për deklaruar është shumë e vështirsuar.
Lidhur me këtë propozim, mbrojtësi i të akuzuarit Musliji, avokat Besnik Berisha ka kundërshtuar propozimin e prokurores, duke theksuar se sigurimi i tyre, nuk paraqet ndonjë vështirësi.
Në koherencë të kësaj, trupi gjykues, ka refuzuar propozimin për dëgjimin e dëshmitarëve, ndërsa për të vazhduar me elaborimin e provave, gjyqtari Bajraktari ka caktuar seancën e radhës me datën 18 qershor.
Ndryshe, sipas aktakuzës, tre të akuzuarit kishin vepruar si një grup kriminal i strukturuar dhe i organizuar me qëllim të përfitimit të dobisë financiare, ku pa autorizim kanë shitur dhe transportuar substanca narkotike të llojit heroinë.
Sipas aktit të akuzës, i pandehuri Fatmir Musliji e kishte formuar dhe organizuar këtë grup kriminal të përbërë nga persona të ndryshëm në mes tyre edhe të pandehurit, Brahim Xhemajli dhe Z.G.
Sipas Prokurorisë, Musliji nga dhjetori 2008 e deri në shkurt 2009 ka organizuar transportimin dhe shitjen e mbi 40 kilogramë heroinë për në Gjermani nëpërmjet rrugëve tokësore të disa shteteve, ndërsa për pjesën me të vogël të heroinës e ka organizuar shitjen e paautorizuar në tregun kosovar.
Musliji dhe Xhemajli akuzohen nga Prokuroria Speciale e Kosovës, për krim të organizuar që ndërlidhet me veprën penale të blerjes, posedimit dhe shitjes së paautorizuar të narkotikëve të rrezikshëm..
Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.
Monitoruar nga Gentrit Kuqani
