Në Gjykatën Themelore në Prishtinë- Deparatamentin për Krime të Rënda, është mbajtur shqyrtimi fillestar ndaj të akuzuarve Nazif Krasniqi si dhe Muhamet Blakqori, që të dy zyrtar të Regjistrit Civil në Komunën e Prishtinës.
I akuzuari Nazif Krasniqi, nga Prokuroria Themelore në Prishtinë, akuzohet për shkak të veprës penale “Keqpërdorimi i pozitës apo autoritetit zyrtar”, ndërsa i akuzuari Muhamet Blakcori, akuzohet për shkak të 4 veprave penale të “Falsifikimi i dokumentit zyrtar”.
Të njëjtit në këtë seancë u deklaruan të pafajshëm, duke shtuar se nuk e ndjejnë vetën fajtorë për këtë veprë penale.
Kryetarja e trupit gjykues Sulltane Hoti, i njoftoj të njëjtit se në afatin prej 30 ditëve mund të paraqesin kundërshtimet e tyre si dhe kërkesën për hudhjen e aktakuzës.
Sipas aktakuzës, i akuzuari Nazif Krasniqi, akuzohet se në cilësinë e zyrtarit të gjendjes civile në Komunën e Prishtinës, duke shfrytëzuar pozitën apo autoritetin e tij zyrtar, ka tejkaluar kompetencat e tij dhe nuk ka përmbushur obligimet ligjore, me qëllim të përfitimit për vetë apo personin tjetër, në atë mënyrë që ka regjistruar kudërligjshëm personin R.F në librin e të lindurve në zyrën e gjendjes civile në Prishtinë, në Ulpian, duke mos përfilluar procedurat e regjistirmit të personave sipas udhëzimit administrativ të Ministrisë së Punëve të Brendshme.
Me këtë i akuzuari Nazif Krasniqi, akuzohet për shkak të veprës penale “Keqpërdorimi ipozitës apo autoritetit zyrtar”.
Ndërsa, i akuzuari Muhamet Blakqori, akuzohet se në cilësinë e zyrtarit të gjendjes civile në Komunën e Prishtinës, nuk ka përmbushur detyrat e tij zyrtare, në atë mënyrë që ka futur në sistemin elektronik të gjendjes civile personin R.F, A.B, N.T dhe E.I, duke mos i përfillë procedurat e regjistrimit të personave sipas udhëzimit administrativ të MPB-së dhe të cilët persona nuk ekzistojnë të librat e skanuar të Agjencisë për Regjistrimin Civilë dhe as në dosjen e regjistrimit.
Me këtë i akuzuari Muhamet Blakcori, akuzohet se ka kryer 4 vepra penale të “Falsifikimit të dokumentit zyrtar”.
Shënim: Të akuzuarit e përmendur në këtë postim konsiderohen të pafajshëm derisa të vërtetohet fajësia e tyre me aktgjykim të formës së prerë të gjykatës.
Monitoruar nga Rinor Bajrami