Në Gjykatën Themelore në Gjakovë, Departamenti për Krime të Rënda, ka dështuar të mbahet seanca e shqyrtimit fillestar ku të akuzuar janë Arben Bakalli, Drejtor i Drejtorisë për Planifikim Urban dhe Mjedis, Agron Gojani, Urbanist i Sektorit për Planifikim dhe Rregullim Urban si dhe Zenel Shabani, Zyrtar i lartë për çështje juridike.
Në seancën e shqyrtimit fillestar nuk ishte prezent mbrojtësi i të akuzuarit Agron Gojani, av. Granit Vokshi, ku i njëjti përmes parashtresës se datës 19.01.2024 ka informuar gjykatën që për ditën e sotme është i angazhuar në një shqyrtim tjetër gjyqësor në departamentin special dhe nuk mund të marr pjesë në këtë seancë.
Gjithashtu pala e dëmtuar Petrit Morina nuk ishte i pranishëm, si dhe përfaqësuesja e tij av. Edona Sina, edhe pse të njëjtit ishin ftuar në mënyrë të rregullt dhe mungesën nuk e kanë arsyetuar.
Kështu që kryetari i trupit gjykues Ilir Rashkaj ka shtyer seancën e sotme për datën 12.02.2024, meqenëse nuk janë plotësuar kushtet për mbajtjen e seancës së shqyrtimit fillestar.
Sipas aktakuzës me datë 10.06.2020, në objektin e Komunës së Gjakovës, të pandehurit duke vepruar si bashkëkryerës e duke e shfrytëzuar detyrën zyrtare, tejkalojnë kompetencat e tyre me qëllim të përfimit të dobisë pasurore për personin T.D nga Gjakova.
Arben Bakalli, në cilësinë e Drejtorit të Drejtorisë për Planifikim Urban dhe Mjedis, lëshon vendim për leje ndërtimi të ndërtesës shumë banesore ndërsa i pandehuri Agron Gojani në cilësinë e Urbanistit në Sektorin për Planifikim dhe Rregullim Urban, njëherit bartës i lëndës pranon që të lëshohet leja e lartcekur. Ndërsa i pandehuri Zenel Shabani si zyrtar i lartë për çështje juridike pranë kësaj drejtorie harton vendimin për pajisje me leje ndërtimi të lartcekur sipas kërkesës së personit T.D, dhe atë në kundështim me nenin 21 par.1 dhe 2 të Ligjit për Ndërtim, dhe në kundështim me Planin Rregullues Urban (Jugu 2) ashtu që me këtë veprim investitorit ia lejojnë ndërtimin e objektit duke ia mundësuar përfitimin e dobisë pasurore përmes rritjes së sipërfaqes së objektit prej rreth 563 m2,
Me çka në bashkëveprim kanë kryer veprën penale ‘’Keqpërdorimi i pozitës apo autoritetit zyrtar’’ nga neni 414, par. 2 lidhur me par.1 dhe neni 31 të KPRK-së.
Shënim: I akuzuari i përmendur në këtë postim konsiderohet i pafajshëm derisa të vërtetohet fajësia e tij me aktgjykim të formës së prerë të gjykatës.
Monitoruar nga Elvana Hatashi
