Në Gjykatën Themelore në Prishtinë – Departamentin Special, është dëgjuar një dëshmitarë në rastin ndaj të akuzuarve Bahri Nuredini dhe Driton Mehaj, ish-zyrtar të Aeroportit Ndërkombëtar të Prishtinës, të akuzuar për keqpërdorim të pozitës zyrtare.
Seanca ka vazhduar me dëgjimin e dëshmitarit L.F.
Dëshmitari L.F. i propozuar nga Prokuroria Speciale, në pyetjen se a qëndron pranë deklaratës së dhënë në Prokurori i njejti theksoi se qëndron pranë edhe pse nuk i kujtohet cdo detaj. Lidhur me punën dhe detyrat e tij në sekretariat në punën e projektit të Aeroportit, dëshmitari shtoi se ka qënë udhëheqës i njësisë implementuese.
Kurse, lidhur me përmbajtjen e kontratën bazë të koncesionimit të Aeroporitit, dëshmitari theksoi se ishte në dijeni për kontratën, kurse sa i përket përgjegjësisë për mbikqyrjen e kësaj marrëveshje, dëshmitari shtoi se sipas njohurisë së tij përgjegjës ishte Komiteti drejtues ndërministor.
Ndërsa, sa i përket rekomandimeve të adresuara në KDNM, lidhur me ndryshimet e kontratës bazë të koncesionimit të Aeroportit, dëshmitari shtoi se në praktikë kanë dhënë rekomandime të përgjithshme.
Kryetari i trupit gjykues Kujtim Krasniqi, theksoi se sipas objektit të akuzës kanë mbetur edhe dy dëshmitarë dhe nëse sigurohet prania e tyre do të dëgjohen në seancën e radhës.
Në rrjedhë të kësaj, seanca e sotme u ndërpre, për të vazhduar me datë, 15 dhe 22 prill nga ora 09:30.
Ndryshe, sipas Prokurorisë Speciale, të akuzuarit Bahri Nuredini, në cilësinë e Kryeshefit Ekzekutiv të Aeroportit Ndërkombëtar të Prishtinës dhe Driton Mehaj, Menaxher i Kontratës për Furnizim me Sisteme të Navigacionit dhe Rilokim të Sistemeve Ekzistuese, akuzohen se kanë kryer veprën penale “Keqpërdorimi i pozitës apo autoritetit zyrtar”.
Tutje, të akuzuarit përmes Komisionit Rregullativ të Prokurimit Publik kanë shpallur fitues të tenderit OE “TCN International” Sh.P.K, me vlerë të përgjithshme të kontratës 7,808.296.00 Euro, ashtu që të pandehurit e kanë futur rilokimin e sistemeve ekzistuese në tenderin e ri edhe pse ky ka qenë obligim kontraktual i kompanisë “LIMAK”, ndërsa gjatë zbatimit të projektit, nuk i kanë ndërmarrë masat mbrojtëse ndaj OE të paraparë me ligj dhe kontratë.
Sipas aktakuzës, në mënyrë të kundërligjshme është bërë zgjatja e afatit të kontratës nga 523 ditë, në 1 mijë e 700 ditë dhe thuhet se edhe pas zgjatjes së këtij afati, kontrata nuk është përfunduar, por e njëjta është shkëputur në mënyrë të njëanshme nga ky operator më 19 shtator 2016, marrë për bazë se deri në këtë datë i ishin paguar 97% e mjeteve financiare nga vlera e përgjithshme prej 7 milionë e 808 mijë e 296 euro.
Nuredini dhe Mehaj, akuzohen se i kanë shkaktuar dëm material buxhetit të AShNA dhe buxhetit publik, në lartësi të paktën 1,937,230 Euro.
Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.
Monitoruar nga: Arton Hoxha
