Sot në Gjykatën Themelore Prishtinë në Departamentin e Përgjithshëm gjyqtari Sabit Sadikaj konstatoi se nuk ka kushte për tu mbajtur seanca pasi që mungoi dëshmitari B.K ndaj të cilit prokurori i rastit ka pasur që ta rirmarrë në pyetje. Në këtë çështje penale i akuzuar është Skender Hyseni për mos raportim apo raportim të rremë i pasurisë, i të ardhurave, i dhuratave i dobisë tjetër materiale ose i detyrimeve financiare.
Gjyqtari konstatoi se të pranishëm në sallë ishin prokurori dhe i akuzuari Skender Hyseni me mbrojtësin e tij, kurse dëshmitari B.K si zyrtar në Agjencinë Kundër Korrupsion mungoi në seancë edhe pse ka qenë i njoftuar për këtë seancë.
Prokurori deklaroi se mendoj që duhet të jetë i pranishëm dëshmitari pasi që në pyetjen e parashtruar nga gjyqtari nuk ishte përgjigjur, pasi që prokurori që ka prezentuar në seancën ku është marrë në pyetje dëshmitari ka kërkuar përjashtimin e gjyqtarit dhe seanca është ndërprerë. Dhe poashtu gjykata pasi ta marrë në pyetje dëshmitarin sipas dispozitave të Kodit të Procedurës Penale prokurorit duhet të ia jep mundësinë e rimarrjes në pyetje të dëshmitarit meqenëse është propozuar nga prokurori i shtetit si dëshmitarë përfaqësuesi i Agjenciës për Parandalimin e Korrupsionit.
Mbrojtësi i të akuzuarit Skender Hyseni ka kundërshtuar propozimin e prokurorit që seanca të shtyhet dhe të ftohet dëshmitari nga AKK pasi që konsideroj se të gjitha pyetjet janë konsumuar të gjitha pyetjet janë parashtruar nga prokurori dhe nga ana e palës mbrojtëse andaj propozoj që të vazhdoj seanca për shkak të ekonomizimit të çështjes.
Gjyqtari mori aktvendim me të cilin aprovoi propozimin e prokurorit ashtu që seanca ndërpritet për të vazhduar seanca me datën 21 nëntor 2023 nga ora 13:30.
Sipas aktakuzës të Prokurorisë Themelore Prishtinë e ngritur me datë 10 dhjetor 2021 i akuzuari ngarkohet me akuzën se në cilësi të zyrtarit të lartë publik-Koordinator Shtetëror për Dialog në Zyrën e Kryeministrit, me dashje nuk ka paraqitur të dhënat e kërkuara në formularin për deklarimin e pasurisë me rastin e marrjes së detyrës Koordinator Shtetëror për Dialog në Zyrën e Kryeministrit, të dorëzuar në Agjencinë Kundër Korrupsionit, ashtu që nuk e ka deklaruar veturën e tipit Volkswagen, viti i prodhimit 2013 në vlerë prej 13.000 euro, në pronësi të bashkëshortes së tij.
Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.
Monitoruar nga Arta Hyseni dhe Rinor Bajrami
