Në Gjykatën Themelore në Prishtinë-Departamenti për Krime të Rënda, është mbajtur seanca e shqyrtimit fillestar në çështjen penale ndaj të pandehurit Sadedin Sharku, i akuzuar për veprën penale “Dhënia e ryshfetit”.
Në këtë seancë, i akuzuari Sadedin Sharku ka pranuar fajësinë për veprën penale për të cilën akuzohet.
Mbrojtësi i të pandehurit Sharku, avokat Ahmet Tahiraj i propozoi gjykatës që t’a aprovoj pranimin e fajësisë, si dhe i njëjti, i propozoi gjykatës që të mbrojturit të tij, t’i shqiptoj një dënim të kushtëzuar.
Tutje, prokurorja Merita Lumezi deklaroi se pajtohet me pranimin e fajësisë nga ana e të pandehurit si dhe shtoi që pranimi i fajësisë të merret si rrethanë lehtësuese gjatë matjes së dënimit.
Në koherencë të kësaj, gjyqtari Ngadhnjim Arrni aprovoi pranimin e fajësisë, kurse shpallja e vendimit është caktuar me datën 7 dhjetor, 2023.
Ndryshe, sipas aktakuzës, Sadedin Sharku, akuzohet se në mënyrë të drejtpërdrejtë, për vete i ofron dhuratë të paarsyeshme personave zyrtar, në mënyrë që ata persona të veprojnë në kundërshtim me detyrën zyrtare.
Sipas këtyre veprimeve, i akuzuari Sadedin Sharku akuzohet se ka kryer veprën penale “Dhënie e ryshfetit”, nga neni 422, paragrafi 2 të Kodit Penal të Republikës së Kosovës.
Shënim: Të akuzuarit e përmendur në këtë postim konsiderohen të pafajshëm derisa të vërtetohet fajësia e tyre me aktgjykim të formës së prerë të gjykatës.
Monitoruar nga Gentrit Kuqani
